7090.- ÁNXEL ÁLVAREZ LLANO.

ÁNXEL ÁLVAREZ LLANO.

Nació Ánxel Álvarez Llano en Boo, Ayer, ASTURIAS, en 1958

Llicenciáu en Filoloxía Hispánica y Especialista en Filoloxía Asturiana pola Universidá d’Uviéu. Collaborador en delles publicaciones periódiques como Lliteratura, Lletres Asturianes, Suplementu Cultura de LNE, Estaferia Ayerana y Montaña Central. Responsable de textos y contenidos nel Estudiu de Diseñu Gráficu Área Norte. Collaborador con programas de cultura asturiana en RPA y Cadena COPE.

PUBLICACIONES.

Poesía: Les agües muertes, Editora del Norte, Mieres, 1994. Vieyos fuebos, fresques cenices, Editora del Norte, Mieres, 1995. Güéspede del silenciu, Editora del Norte, Mieres, 1996. Na mesma piedra, Trabe, Uviéu, 2002. Edición Lliteraria: Antoloxía del Cuentu Asturianu Contemporaneu, Editora del Norte, Mieres, 1994. Obra poética completa de José Campo, Editora del Norte, Mieres, 1996. Muestra de nueva poesía, SPPA, Uviéu, 1998. Traducción: Sánchez Ferlosio, R.: Alfanhuí, Editora del Norte, Mieres, 1996. Argüelles, F.: Lletaníes de lluvia, Editora del Norte, Mieres, 1997. Coto, B.D.: Nuberu nel tiempu, Editora del Norte, Mieres, 2001. Llingüística, Lliteratura. “Provincianismu y universalidá na narrativa asturiana”, en Lliteratura asturiana nos 90 (IV Xunta d’escritores asturianos), SPPA, Uviéu, 1997. Toponimia de la parroquia de Bo, ALLA, Uviéu, 2001. “El Surdimientu. La narrativa”, en Historia de la Lliteratura Asturiana, ALLA, Uviéu, 2002. “La novela y el cuentu escritos por homes na década de los 90”, en La emancipación de la lliteratura asturiana, Conseyería de Cultura, Uviéu, 2007. “Sieglu XXI: Tiempu de renovación xeneracional na poesía asturiana”, en El Conceptu Xeneracional, Trabe, Uviéu, 2007

PREMIOS.

Premiu Elvira Castañón, 1993. Premiu Vital Aza, 1994,. Premiu Fernán Coronas, 1995, Accésit del Premiu de Recoyida de Material Toponímico, 2000, de l’Academia de la Llingua Asturiana, col trabayu Conceyu d’Ayer: Parroquía de Bo. Premiu Teodoru Cuesta, 2001. Premiu Fernán Coronas, 2010.

ANTOLOGÁU.

Cinco años de lliteratura asturiana, Editora del Norte (1998) - Antoloxía Poética Asturiana (1639-2000) (asturiano-ruso), de Federico Fierro-Botas y Alexander Yéschenco (2000) - Palabres de Casa (Conseyu de Comunidaes Asturianes), de Pablo Manzano (2004) - Palabres Clares, de José Luis García Martín (2005) - Toma de tierra, de José L. Argüelles (2010)

ANTOLOXÍA

EL VINU que bebí nos llabios de la nueche

faise rancio, nun tien tastu a roses y lloréu,

ye l’agrín posu de los vasos

que refugué perdayuri.

Por eso nun t’escaezas de mí, tiempu

qu’arreblagues pencima los díes y la memoria

y dame’l velenu ingrientu que taraza

dame l’abrazu infinitible y mortal

y déxame nel sable del escosu mar

pa que les incendiaes gaviotes de la tarde

quemen los caberos barcos

qu’al debalu agüeyo tres el borrín

pa que’l naufraxu seya la ufierta

que siempre quixi facer a los dioses.

PIESLLA la puerta, zuna inxeme

qu’enduvielles los suaños

y abluques la velea

y déxame ver la lluz

qu’enantes que lluz foi fuebu

nos güeyos de los amantes,

foi la mar d’espeyu roxu

dexándose amasuñar pola nueche,

foi un ábanu d’estrelles

al abellugu l’amanecerín

del cálidu branu.

                   (De Les agües muertes)

MEMORIA DE BRANU

Agua calecío del branu

pa la soledá de los güertos,

dexando morrer les flores

na solombra del poema

non escritu, nin siquiera

aparexáu na memoria

de los bedules

-arpexu d’agua sobre’l verde

y cordial territoriu del arbolíu-.

Los caminos vacíos de pasos

y parola tardiega d’inciensos

hasta la llende mesma de la nueche.

Dixérenme que yera agostu

y cuéstame trabayu creyelo.

Atapecer

I

El sol tardiegu

cuando zarres los güeyos

dafechu muerre.

II

Rosa ensin llabios

dame l'últimu besu

faise de nueche.

III

Silenciu del sol

afogándose na mar,

relluma l'agua.

BIOGRAFÍA

Poco importa la biografía del viaxeru,

si ricu, si probe, la so raza,

el color del pelo, la so llingua,

la so nacionalidá.

Anduvo pel norte engañando al corazón

perdíu pente la nublina.

Percorrió’l sur

que yera un ermu, ardiéndo-y nes venes

el calor de la inxusticia.

Importa qu’un día dexó la casa

y qu’otru volvió colos pies galdíos

cargáu de tiempu y vida que contar.